dada的旅遊天空

食飽後最好嘅活動當然係散步啦。於是我地就駕車到附近嘅神威岬睇下。

一落車都唔多覺，但當我地向海邊越行越出就發覺。。。好大風呀！

ｄ風真係吹到呼呼聲，我地行過女人禁地個牌就見到個海，好靚，

海水寶藍色，真係好靚。




只可惜有霧或煙霞，望唔倒太遠，又蒙蒙地，而且因為太大風，

出去嗰段路封左，有ｄ失望。
我地喺嗰度行下，影下相，吹到個頭癲左就走lu。

本來跟住去島武意，但礙於時間關係同諗住都係望海啫，

就求其停左喺一個沙灘，落車影下相，

感受下日本人夏天假日一家人去沙灘玩或紮營嘅氣氛。




我地駕車沿路都見到好多人紮營同bbq，好似好relax同enjoy咁，
攪到我好羡慕佢地可以對住咁靚嘅海享受假期。
回程時途經余市嘅生果檔，我地食左呢次旅程中最好食嘅蒸黃粟米，
真係好甜，好多汁。之後再喺其他地方食都食唔番了。

我地喺小樽停一停，行左個圈，同買左個芝士蛋糕今晚食。



跟住就返札幌，一入札幌市，又塞車，真係好多車呀，又多燈位，
攪到好晏，行唔到街了
咁唯有去ESTA頂層食拉麵，喺三間食味噌拉麵嘅舗頭中我地揀左食〔大空｝，
都幾好食．

再食埋個甜品就滿足了．個人認為ESTA頂層嘅〔山中牧場〕係最好味嘅，
因為好香奶味又唔太甜．我每次去札幌都必食．


跟住去大通公園行一陣就返酒店了．原來晚上嘅大通公園都好熱鬧呢，
有三三兩兩在傾計，又有人玩滑板，x bike，又有樂隊在jam歌．．．

返到酒店食芝士蛋糕啦！

以前都去過小樽兩次但唔知點解從來都冇試過呢款芝士蛋糕．
今次會試係因為見過其他網友激讚佢，話好正，所以我地又試．
果然好味，又滑，又香，又唔太甜，又唔膩，真係要試．但提一提，
呢款蛋糕係要解凍後先食得，仲要係全解凍（如果唔係冇咁滑），
即係唔可以即買即食（堂食件裝例外）．