2012盛夏北海道自駕遊-Day 2 part I 積丹－dada的旅遊天空

今朝一早瞓醒就落樓下食個早餐先。我一直都以為住呢間Chisun hotel係唔包早餐嘅，直至琴晚check in 時先知原來係包嘅，當堂喜出望外呀。個早餐係自助形式，都有幾多選擇，絶對好過東橫inn好多倍。

食飽後就出發去攞車，我地慢慢行去時計台附近嘅mazda租車(其實Chisun hotel都只不過係時計台後面條街)，好快就到了。約左9點攞車，我地就真係9點到達。架車係早喺4月時上網經tocoo book嘅。之前提過我地原本諗住坐JR，因為知道七、八月份喺北海道租車好貴，但我4月喺tocoo個網睇夏季mazda租1300c.c.車都只係平均4700日元一日(已包免責保險)，我就即刻改變主意由坐JR到自駕遊了。無錯，我當時都有諗”有無咁平呀”，因為真係好難相信，其他所有租車公司都要起碼7000日元一日，但唔理了，既然tocco都email覆我confirm我嘅booking，咁就一於少擔心咁多。

去到mazda櫃台，學之前網友話齋，俾齊”租車四寳(護照，國際駕照，booking email同信用咭)”佢，好快就攪掂。我地仲即場加租多一日同改還車地點，個職員打左個電話之後就話無問題，我接過張單後第一時間望下個總數，果然係~4,3000日元，嘩，真係咁平，好開心呀^^ 之後就拿拿聲出去check車，係一架深灰色mazda demio，車仔細細但都幾有形，個行李箱仲放發得落我地兩個中筴有餘。環繞架車一週後發現架車後bumper角有微花，即刻同職員講，咁佢就mark低，咁做係避免還車時被追究賠償。之後個職員仲教我地用個GPS，可以選擇日文或英文。